హైదరాబాద్: గురునానక్ జయంతి ఊరేగింపు సందర్భంగా శనివారం సాయంత్రం 4 నుంచి రాత్రి 10 గంటల వరకు హైదరాబాద్ ట్రాఫిక్ ఆంక్షలు అమలులో ఉంటాయని ట్రాఫిక్ పోలీసులు ప్రకటించారు. గురునానక్ దేవ్ 557వ జయంతిని పురస్కరించుకుని నవంబర్ 21న ఈ మతపరమైన ఊరేగింపు జరగనుంది.
అశోక్ బజార్లోని గురుద్వారా నుంచి ప్రారంభమయ్యే ఊరేగింపు అఫ్జల్గంజ్ వైపు సాగుతుంది. అక్కడి నుంచి ఎస్ఏ బజార్, ఎంజే మార్కెట్, పుత్లీబౌలి, గౌలిగూడ చమన్, శంకర్ షేర్ హోటల్ మీదుగా వెళ్తుంది. ఈ ప్రాంతాలన్నీ దాటిన తర్వాత ఊరేగింపు తిరిగి అశోక్ బజార్ గురుద్వారాకు చేరుకుంటుంది.
అఫ్జల్గంజ్, ఎంజే బ్రిడ్జి సహా 12 జంక్షన్లలో హైదరాబాద్ ట్రాఫిక్ ఆంక్షలు
ఊరేగింపు మార్గంలోని గౌలిగూడ చమన్, అఫ్జల్గంజ్, ఎంజే బ్రిడ్జి, పుత్లీబౌలి, సీబీఎస్ బస్టాండ్ సహా 12 ప్రధాన కూడళ్లలో ఆంక్షలు ఉంటాయని ట్రాఫిక్ అడ్వైజరీలో పేర్కొన్నారు. అయితే ఊరేగింపు ముందుకు సాగే తీరును బట్టే ఆయా ప్రాంతాల్లో వాహనాలను మళ్లిస్తామని పోలీసులు స్పష్టం చేశారు.
శనివారం సాయంత్రం 4 నుంచి రాత్రి 10 గంటల మధ్య ప్రయాణించేవారు ప్రత్యామ్నాయ మార్గాలు ఎంచుకోవాలని పోలీసులు సూచించారు. ఈ కూడళ్ల మీదుగా వెళ్లే వాహనదారులు ఆంక్షలకు తగ్గట్టు ప్రయాణాన్ని ప్లాన్ చేసుకోవాలని కోరారు. మళ్లింపులపై తాజా సమాచారం కోసం హైదరాబాద్ ట్రాఫిక్ పోలీసుల అధికారిక సోషల్ మీడియా ఖాతాలను అనుసరించాలని విజ్ఞప్తి చేశారు.
ట్రాఫిక్ రాకపోకలు, ప్రత్యామ్నాయ మార్గాలపై సహాయం కావాలంటే 9010203626 హెల్ప్లైన్ నంబర్ను సంప్రదించవచ్చని పోలీసులు తెలిపారు.
