హైదరాబాద్: థర్డ్ పార్టీ బీమా గడువు ముగిసిన వాహనదారులను అప్రమత్తం చేసేందుకు జాతీయ రహదారుల ప్రాధికార సంస్థ (NHAI) కొత్త విధానాన్ని ప్రారంభించింది. టోల్ ప్లాజాలు దాటే సమయంలో బీమా లేని వాహనాలను గుర్తించి యజమానులకు SMS పంపే పైలట్ వ్యవస్థను ఢిల్లీలోని ముండ్కా టోల్ ప్లాజా వద్ద అందుబాటులోకి తెచ్చింది.
దీనికోసం టోల్ ప్లాజాల వాహన వివరాలను నేషనల్ ఇన్ఫర్మేటిక్స్ సెంటర్ (NIC) నిర్వహించే వాహన్ డేటాబేస్తో అనుసంధానిస్తున్నారు. ఆటోమేటిక్ వ్యవస్థ ద్వారా బీమా చెల్లుబాటును తనిఖీ చేస్తారు.
వాహన బీమా అలర్ట్స్లో గడువు వివరాలు
బీమా గడువు ముగిసినట్లు గుర్తిస్తే, టోల్ దాటిన కొద్ది నిమిషాల్లోనే రిజిస్టర్డ్ మొబైల్ నంబర్కు సందేశం పంపుతారు. అందులో వాహన రిజిస్ట్రేషన్ నంబర్, టోల్ దాటిన సమయం, బీమా గడువు ముగిసిన తేదీ ఉంటాయి. వెంటనే పాలసీని పునరుద్ధరించుకోవాలని సూచిస్తారు.
పైలట్ విజయవంతంగా స్థిరపడిన తర్వాత దేశవ్యాప్తంగా టోల్ ప్లాజాలకు ఈ విధానాన్ని విస్తరించాలని NHAI యోచిస్తోంది. ప్రమాద బాధితులకు పరిహారం అందడంలో ఎదురవుతున్న ఇబ్బందులను తగ్గించడం ఈ చర్య ఉద్దేశం. ప్రజా రహదారులపై వాహనాలు నడపడానికి థర్డ్ పార్టీ బీమా తప్పనిసరి.
బీమా లేకుండా వాహనం నడిపితే మోటారు వాహనాల చట్టం ప్రకారం జరిమానా విధిస్తారు. మొదటిసారి పట్టుబడితే ప్రాథమిక ప్రీమియంకు 3 రెట్లు లేదా రూ.5,000లో ఏది ఎక్కువైతే అది జరిమానాగా ఉంటుంది. రెండోసారి పట్టుబడితే 5 రెట్లు లేదా రూ.10,000 వరకు జరిమానా విధిస్తారు.
